زي كل يوم جمعة، دخلت السوبر ماركت لشراء طلبات البيت، وفي مشهد غريب ومريب شبه لقطة من فيلم وثائقي عن مجاعات الدول، كانت رفوف السوبر ماركت فاضية تمامًا، خاصة رف الزيت والأرز والدقيق. قلت في سري شكل أجواء كيك العشر دقايق والرز باللبن راجع تاني، لكن الواقع كان أسود من كده الحقيقة.
عرفت أنه أسود من كده أول ما سمعت صوت سيدة أربعينية غير مصرية بتقولي: «عن إذنك»، وفي أقل من ثانية لمت كل الباقي على الرف في عربيتها! أيون عربة التسوق دي، ومشيت السيدة تترنح للكاشير وأنا وراها وفي قلبي نية «أقسم بالله هتخانق مع الكاشير لو باع ليها الكميات دي».
الحقيقة الكاشير رفض يبيع ليها الكميات اللي ممكن تكفي 3 أسر في شهر، وقالها إن من حقها تشتري عدد 2 من كل سلعة عشان يقدر يطلع ليها فاتورة، وفجأة وأنا على ملامحي علامات «والله وعملوها الرجالة»، السيدة قالت ليه بكل جبروت: «خلاص اعملي 5 فواتير أنت خسران إيه؟».
سألت الكاشير: «أنت رفضت في الأول ليه ووافقت تضرب ليها أكثر من فاتورة وأنت عارف إنه مش حقها؟». كان رده: «اسألي اللي دخلهم يا أنسة البلد مش أنا».
رغم اقتناعي إن الطمع والاستحواذ بدون الحاجة سلوك شخصي ومالوش علاقة بجنسية، ومدركة إن في كتير حوالينا بيعملوا نفس التصرف، إلا إني كنت عايزة أعرف هما بيدفعوا مقابل إقامتهم؟ سؤال عادي والله.
دورت كتير وحاولت أفهم عشان أعرف أقبل، ماهو ما ينفعش نقبل من غير ما نفهم! وعرفت إن الإقامة في مصر حسب قوانين 2023-2023 أربع أنواع، دراسية واعتيادية، علاجية أو سياحية، واستثمارية وعقارية، وإقامة الـ UN (لاجيء إنساني).
وفي 31 يناير 2018، قامت المفوضية السامية للأمم المتحدة لشؤون اللاجئين في مصر بتسجيل 221،675 من اللاجئين وطالبي اللجوء، 57٪ منهم من سوريا، و43٪ من 55 دولة مختلفة زي السودان وإثيوبيا وإريتريا وجنوب السودان والعراق والصومال واليمن وغيرهم.
وتقرير تاني اتنشر في 2019، بيقول إن مصر فيها 9 ملايين مهاجر دولي ينتموا لـ 133 دولة، وأن أعداد القادمين زادت، منهم السودانيين اللي وصلوا لـ 4 مليون والسوريين 1.5 مليون واليمنيين مليون، والليبيين مليون، و300 ألف من جنوب السودان، و200 ألف من الصومال، و150 ألف من العراق، و135 ألف و932 من فلسطين، و17 ألف إثيوبي، و600 ألف سعودي.
نرجع تاني لسؤالنا.. هما بيدفعوا مقابل إقامتهم وهما بالأعداد دي؟
لاقيت تقرير منشور بيقول إن الإقامة السياحية أو العلاجية أو الدراسية إللي مدتها سنة واحدة تكلفتها 1002 جنيه، ما عدا رسوم التقديم 350 جنيه + 550 رسوم مصاريف كارت الإقامة.
ولو إقامة ثلاثية يعني 3 سنين التكاليف هتكون 2002 جنيه + رسوم التقديم 350 جنيه + 550 رسوم إصدار كارت الإقامة، اقامة خماسية ( خمس سنوات ) = 3002 جنيه + رسوم التقديم 350 جنيه + 550 رسوم إصدار كارت الإقامة.
طيب ولو إقامة لغاية عشر سنوات، فكل سنة هيدفع 500 جنيه + 350 جنيه رسوم تقديم + 550 رسوم إصدار كارت الإقامة، ولو إقامة خاصة = 550 جنيه + رسوم التقديم + 550 رسوم إصدار كارت الإقامة.
كل ما فات من أرقام منشور، وممكن تدخل تتأكد منه وتزودني كمان بمعلومة واضحة وبسيطة كده، عشان للأسف مافيش حتى بيان رسمي يوضح أي حاجة، وعقبال ما أروح أخزن سلع أنت تكون لاقيت إجابة.