عاوزة أتكلم عن المسلسل ده اللي ممكن ناس كثير ماتكنش شافته، وناس أكثر ممكن تكون شافته بس ممكن ماخدوش بالهم من حاجات كتير. بعيد عن الضحك وأن المسلسل شبهنا أوي في حاجات كتير، إلا أن المسلسل بيورينا حقائق أكثر في إطار كوميدي.
1- بيورينا أن مافيش حد ضعيف أو مش عارف هو بس محتاج فرصة.
2- مافيش حاجه بتحصل في حياتك صدفة كله خير.
3- بيورينا أن الأصل الطيب بيبان دايمًا، وأن الطيب مش أهبل ولا ضعيف هو إنسان عنده قلب وهو اللي بيكسب في الآخر.
4- بيورينا أن الفساد إحنا السبب فيه، لو غيرنا نفسنا كل حاجة حتتغير. عاطف كان كويس بس حاجات كتير حواليه كانت غلط ولو ماوقفناش جمبه مافيش حاجة حتتغير.
5- إحنا اللي بنخلق الفاسد والدجال ونمجد لهم وبعدين نشتكي أو على الأقل بنشيل النتيجة اللي ساعات بنحس بيها وساعات لأ.
6- في ناس في حياتنا شكلهم طيب بس أعوذ بالله، بس دول لما بيبانوا بيبقوا وحشين أوي (حلمية).
7- في ناس تبان وحشة بس أطيب خلق الله وأحسنهم والكلمة بترضيهم وجدعين أوي (كوثر).
8-في ناس حتحبهم من الأول للآخر وحتلقيهم في ظهرك دائمًا (عبد البديع مسئول الحضور والانصراف).
9- في ناس تبان مؤذية ولازم تتعاقب بس أنت بتبقى شايف فيهم صلاح وربنا يهديهم الله يكون في عونك يا عاطف (ابن عبد البديع).
10- في حد حيهون عليك الدنيا وممكن مايبقاش طايقك أو عاوز يضربك بس هو أكثر واحد حيفيدك حتى لو وجعك (هاجر صيدلية).
9- ناس بتمر علينا بس كلامها وأفعالها بيهون علينا كثير (الست اللي بتولد أم عاصم اللي ابنها على أسم الدكتور عاطف).
10- ناس بتصعب عليك الدنيا وبتأذيك بس كله خير ليك، وفي اللي بيتكسف وفي اللي لأ (دكتور الأسنان والنصاب مرزوق).
11- حد بيحبك أوي وبتستحمله علشان كده، بس هو مش عارف أنت مسحول في أي عاوزك سوبر مان بس هو مش شايف انك كتكوت، دائمًا بيعلق على أفعالك وأنت عاوز تقوله سبني في حالي يا حج بس عاوزك كويس (أبو عاطف والله يا أبو عاطف مصر كلها تعبانة بسبب ان عيالها بتنام للعصر).
12- حد حنين عليك أوي وبيهون عليك كل اللي بتشوفه وبيدفعك لقدام وبينصحك بجد وبقلب (أمك).
المسلسل ده حياتنا وحاجات تانية كتير. بعيد بقى عن العمق ده، مش عاوزين ننسى المشاهد الكوميدية في المسلسل. وقد إيه إحنا كلنا عاطف بس محتاجين صبر وخبرة، محتاجين نشتغل علشان الإنسانية والبلد، ولأن ده دورنا في الحياه مش علشان خوف من العقاب ولا المرتب.
في عقاب للي يستاهل بس عقاب للإصلاح مش للهدم. عاطف فضل خايف ماعملش حاجه وأول لما ماخفش صلح حاجات كتير. محتاجين نغير اللوائح والقوانين اللي تقريبًا تعجيزيه وهدامة أكثر من بناءة، ويكون للعاملين للقطاع نصيب من المساهمة فيه لأنهم أكثر ناس عايشه في أرض الواقع ولمساه والقوانين دي تخصهم.
بنشتغل علشان حابين وبس، الحب أقوى من أي شيء. مش شايلين الهم ورانا علشان نقدر نبدع، صحيح مش كلنا مسؤولين عن نفسنا بس في ناس كمان تانية إحنا مسؤولين عنهم بس ده مش معناه أننا نخاف أو نعمل غلط بس نقول يارب وحسبي الله ونعم الوكيل وكل حاجة حتبقى أحسن.
خليك مع ربنا دائمًا حتكسب.
(أنا بقي ده أول تعليق ليا على المسلسل يمكن على المسلسلات عمومًا بالشكل ده، حابه رأيكم وحابه يوصل لصناع المسلسل ونقولهم شكرًا).