وجبات الشارع بعد ارتفاعات الأسعار.. "تخيل إنك بتاكل لحمة"

"طول عمري بعتمد على ساندوتشات الكبده اللي بـ 3 جنيه والحوواشي اللي بـ 10 جنيه.. ومش شاغلني هي فيها ايه.. لكن دلوقتي بعدما البصل غلي.. هنعمل ايه؟ المهم سعرها ما يزيدش".

على مدار عقود، كان طعام الشارع ملاذًا للمواطنين ذوي الدخل المحدود أمثال محسن السعيد، عامل النظافة بإحدى الشركات الخاصة، ممن يسعون إلى سد جوع أبنائهم بشيء من اللحم ردئ الجودة. مسألة الجودة لا تهم هنا إذا كنا نتحدث عن أسعار جاوزت المعقول حتى للميسرين حالًا. يكفي فيه هذه الحالة مكون البصل والدهون وقليل لا يذكر من اللحم.

يقول السعيد: "طول عمرنا عارفين إن الكبده والسجق على العربيات عبارة عن دهن وبصل ورشة لحمة.. لكن ما باليد حيلة.. بعد مابقى ساندوتش الفول والطعمية بـ  6 جنيه. أنا بأقبض 1500 جنيه في الشهر ومراتي معايا في الشركة مرتبها نفس مرتبي.. وعندنا عيلين".

أصبحت ساندوتشات الكبده والحوواشي والسجق بالذات الأكثر جدلًا في الأيام الأخيرة، على اعتبار أن العربات والمحال الصغيرة تعتمد على البصل كمكون أساسي في صناعتها مع قليل من اللحم. وزاد هذا الحديث جدلًا ارتفاع البصل إلى 30 جنيهًا، في وقت لم يحرك أصحاب هذه العربات الأسعار، وهي مفارقة غريبة تم تأويلها إلى وجود لحوم غير صالحة.

نجيب منين تمن الحمار؟

"م. ع"، صاحب محل فطاطري وبيتزا صغير، يرى كل ما يتردد عن جودة المحال الصغيرة "شائعات من الكبار". يقول: "بضحك لما بشوف الناس بتتكلم عن لحم الكلاب.. والقطط والحمير.. وأنها موجودة في السندوتش.. يا أستاذ الحمار بـ 4 آلاف جنيه. مين اللي هيشتريه عشان يدبحه.. وهو فيه كم كيلو لحمة أصلًا؟".

كان الدكتور عمرو مصطفى، عميد كلية الزراعة بجامعة القاهرة السابق، كشف في دراسة تم نشرها في يونيو من العام الماضي، حول الباعة الجائلين في المناطق الشعبية والعشوائية، أن اللحوم المستخدمة لا يوجد لها مصدر أو شهادة بيانات، وعندما تم إعداد تحاليل حولها وبحث 35 عينة منها، كانت النتيجة اكتشاف 15 عينة مخالفة منها 11 عينة لحم خنزير و3 عينات لحوم كلاب وحمير وعينة لحوم خيل.

لكن الفطاطري يقول: "الحسبة بسيطة بنجيب كيلو لحمة مستوردة وبنحط عليه 4 أو 5 كيلو فول صويا وكيلو دهون وبصل وتوابل وحاجات تانية، وعشان تتخلط مع بعض بتحتاج 4 لتر مياه، ومع ملح وفلفل وتوابل بتبقى شبه اللحمة المفرومة العادية، وبنكسب منها.. الفول الصويا بياخد شكل اللحمة وملمسها ولونها".

يعتبر الفول الصويا مكونًا هامًا في صناعة اللحوم المجمدة لدرجة أنه يمكن صناعة لانشون كامل منه دون جرام لحم واحد، مع إضافة فقط مكسبات طعم وألوان صناعية، خاصة وأن سعر الكيلو منه يدور في فلك 25 جنيًها في المتوسط، وانتشر استخدامه أخيرًا كبديل رخيص للبروتين الحيواني خاصة مع النباتيين.

يضيف الفطاطري: "كل المحلات الكبيرة بتعمل كده.. حضرتك فاكر أن كيلو الكفتة اللي بيتباع في بعض المحال الكبيرة بـ 300 جنيه صافي.. دي نفس الخلطة، واللي بيفرق بين محل ومحل هو نسبة اللحمة ونسبة فول الصويا.. فيه محلات بتحط النص والنص وفيها التلت والتلتين، واللي بيستخدم لحمة صافي مش هتلاقي أسعاره أقل من 400 جنيه للكيلو".

بالطريقة ذاتها تبرئ محال الكبدة مكونات المنتج الذي يبيعونه، يقول "محمود. ع" عامل بمطعم كبير بوسط القاهرة: "الفكرة مش في سعر السندوتش.. الفكرة هو فيه كبده قد أيه.. لو بصيت في السندوتش هتلاقي نص رغيف فينو صغير فيه 20 جرام كبده والباقي الصوص بتاعها وبصل.. يعني الرغيف كله 40 جرام".

"المخ" يغيب بسبب الأسعار

يضيف: "بنشتغل في الكبده الإسكندراني بس.. بنحط كبده مجمدة مستوردة من بره، الكيلو في الجملة عامل حوالي 110 جنيه.. وبنضيف له بصل وفلفل ودهون وشطة خضراء.. كيلو خام يتكلف حوالي 170 جنيه بقى اتنين وبنبيعه بحوالي 450 جنيه في السندوتشات؛ لأن الكبده بتكش على النار.. والمكسب ده اللي بندفع منه العمالة والكهرباء والمياه والضرائب".

أوقف أصحاب محال الكبده العمل في وجبة المخ. "عشان ده ما ينفعش نضيف له أي إضافات.. وبقى بيخسر معانا.. زمان كنت ببيع ساندوتش المخ بـ 25 جنيه لكن دلوقتي عشان أبيعه مش هأقدر أبيعه أقل من 50 جنيه، وده مبلغ الناس ما تقدرش عليه.. بطلنا كمان الكبده بالردة لأن عشان أكسب منها محتاج برضه أبيع السندوتش بـ 15 جنيه".

الصلصة المصنعة.. بديل لا يصلح

يقول "ع . س"، صاحب عربة كشري بمصر القديمة: "ما نقدرش نستغنى عن البصل في الكشري، لكن لما سعره رفع شلناه من الطبق خالص.. بعمل كيلو واحد مقلي في اليوم ومع كل 4 علب بدي كيس صغير بس.. لكن علبة لوحدها لأ.. المشكلة دلوقتي في الطماطم بقت غالية وكمان وحشة.. حمرا من بره وصفرا من جوا.. مش مستوية كويس".

مع ارتفاع أسعار الطماطم خلال الفترة الأخيرة لتتراوح بين 25 و30 جنيهًا، لم ينتظر المزارعون نضج المحصول، وتم رشه من الخارج باستخدام مواد كيميائية تقليدية يستخدمونها ويقولون إنها لا تحمل خطورة صحية، لكن جودة المنتج ذاته أصبحت سيئة، إذ تتحول الثمرة إلى جافة وصفراء من الداخل دون عصارة بينما لونها فقط الذي يشهد تغييرًا إلى اللون الأحمر من الخارج.

يضحك صاحب العربة على دعوات استخدام الصلصة كبديل للطماطم، قائلًا: "صلصلة ايه اللي بديل للطماطم.. بستخدم 10 كيلو طماطم يوميًا.. عشان أجيب صلصة محتاج ربعهم على الأقل يعني 2.5 كيلو.. شوف بقى يبقوا كم برطمان من اللي الواحد 350 جرام وسعره 25 جنيه.. أنا بيجيلي زباين بقوا بيشتروا في كيس بلاستيك عشان يوفروا 1.5 جنيه زيادة ثمن علبة البلاستيك وغطاها".

كان الدكتور علي عبد المحسن، رئيس قطاع الشئون الاقتصادية بوزارة الزراعة، دعا الأسر المصرية إلى استهلاك معلبات صلصلة الطماطم بديلًا عن الطماطم الطازجة؛ من أجل تفادي ارتفاع الأسعار مؤخرًا. قال: "الطماطم لها بدائل، نستهلك الصلصة إحنا عاملينها ليه! علشان نستهلكها في هذه الظروف بفترة فواصل العروات (مواسم الزراعة)، وبالتالي نخفف الطلب على الطماطم الطازجة".

الصويا وهرمون الذكورة

على مقربة من عربة الكشري القابعة أسفل كوبري يجمع بين ضفتي المترو، يوجد محل  للكشري يقول مديره إن فول الصويا هو الحل أمام المطاعم حاليًا لمنع ارتفاع الأسعار، خاصة أن كيلو اللحم المجمد بـ 300 جنيه.. وطاجن المكرونة باللحم لا يتجاوز 30 جنيهًا.. و"مهما قلت الكمية فأنا مضطر إلى رفع السعر".

لكن الدكتور محمد حلمي، استشاري التغذية، يقول: "فول الصويا من أهم وأفضل وأرخص مصادر البروتين في الوقت الحالي وله قيمة غذائية مرتفعة لاحتوائه على 68 جرامًا من البروتين، وغناه بالألياف الغذائية التي تساعد على ضبط مستوى الكوليسترول، والفوليك وفتيامين ب والمعادن والكالسيوم ويساعد في تقويم العظام والأسنان".

 لكن لتناوله بأمان يجب ألا يتجاوز استهلاكه مرة واحدة أسبوعيًا، إذ يحتوي على مادة الأيزوفلافينات ذات التأثير المشابه لهرمون الإستروجين بالجسم، ولا توجد دراسات مثبتة أن لها تأثير ضار على هرمونات الذكورة، لكن من باب الاحتياط يمكن تناوله بحرص مرة أسبوعيًا دون إفراط.