حياة صعبة وقاسية بكل تفاصيلها على أي ست مهما كانت فجأة بتلاقي نفسها مضغوطة من تلبية كل احتياجات الطفل بكل تفاصيله من رضاعة وغيار وعياط اللي اكيد مابتبقاش عارفة هو بيعط ليه لحد ما يتأقلموا علي بعض وتفهم..
مضغوطة وعصبية من قلة النوم وأنها لا عارفة تطبخ ولا تاكل ولا تعيش حياتها الطبيعية..
مضغوطة من إنها ديما مرهقة وتعبانة وكل اللي حواليها مش مقدرين ويتم لومها على أنها مجهدة وحالها اتغير..
بتخاف تشتكي علشان الكل أكيد هيتهمها بالدلع وأن الكل بيخلف مش أنتي الوحيدة اللي خلفتي..
والا بقي لما تسمع كلمة تحبط نفسيتها علشان شكلها متغير وأنها ديما مقصرة في حق نفسها وحق اللي حواليها..
ماهو طبيعي حالها يتغير بسبب الظروف اللي اتغيرت،
محتاجة إن جوزها يقويها ويكون جنبها ويساعدها في التفاصيل المؤلمة
وأنها فعلا مش بتدلع وأنها نفسها تكون كويسة ومرتاحة وشكلها حلو زي زمان..
محتاجة أنها تسمع كلمة تقدير وشكر بحب تبسطها وتقوي نفسيتها اللي اكيد بكل التفاصيل دي مدمرة..
الأمومة تفاصيل كتيرة وكبيرة تانية غير فترة بعد الولادة.
الأمومة مسؤلية لها مراحل تانية من مذاكرة وتمارين ومدرسة ودكاترة وبيت وحياة فالأمومة وظيفة ومسؤولية مش هينة أبدا..
الأمومة شئ مؤلم بقدر ماهو شعور حلو لكن الفكرة إن لو اللي حوالينا دعمونا وساندونا وفهموا التغيرات اللي بتعرض لها كل أم واللي غصب عنها دا بيحصل وعرفوا يتعاملوا معاها ومايكونوش هما كمان عبء عليها ويضغطوها زيادة علشان الفترة دي تعدي بسلام عليها وعلي الأسرة كلها..
كونك أم لا بيقلل منك ولا بيعيبك..
كونك أم ف أنتى بكل المقاييس بطلة..